Demonstruesit në kryeqytetin e Shqipërisë hodhën bomba ndezëse ndaj një ndërtese qeveritare, ndërsa policia u përgjigj me topa uji në protestën e fundit të një serie demonstratash të dhunshme që përbëjnë një kërcënim për stabilitetin e mandatit të gjatë të kryeministrit Edi Rama, i cili është në pushtet që nga viti 2013.
Gjatë trazirave, katër efektivë policie u lënduan në përleshje, raportoi rrjeti lokal i lajmeve A2CNN.
Tensionet politike janë shtuar që nga dhjetori, pasi një njësi speciale e prokurorisë akuzoi zëvendësen e Ramës, Belinda Balluku, për ndërhyrje të supozuar në tenderat publikë për projekte të rëndësishme infrastrukturore dhe favorizim të disa kompanive të caktuara, akuza që Balluku i mohon.
Balluku akuzohet për keqpërdorim të detyrës në një çështje të kontratave publike infrastrukturore, përfshirë pretendime se procedurat e prokurimit janë manipuluar për të favorizuar kompani të caktuara.
Të martën, disa persona hodhën koktej molotov dhe objekte të tjera, dhe policia iu përgjigj me gaz lotsjellës dhe topa uji.
“Një grup zgjodhi forcën në vend të fjalëve, duke sulmuar dhe lënduar efektivë të policisë. Dhuna kurrë nuk mund të justifikohet,” tha ministrja e Brendshme, Albana Koçiu.
Konflikti politik në Shqipëri përqendrohet tek pavarësia e drejtësisë dhe korrupsioni mes qeverisë, e udhëhequr nga kryeministri socialist Edi Rama, dhe opozitës konservatore.
Protesta e së martës nisi në qendër të Tiranës, kur mijëra mbështetës të Partisë Demokratike (PD) u mblodhën përpara institucioneve kryesore qeveritare.
Prokuroria e Tiranës e pezulloi Ballukun nga detyrat e saj, një masë juridike që u mbështet edhe nga Gjykata Kushtetuese e këtij vendi të vogël ballkanik. Megjithatë, Rama refuzon ta shkarkojë, duke argumentuar se duhet respektuar parimi i pafajësisë.
Duke iu drejtuar mbështetësve të tij, lideri i PD-së, Sali Berisha, akuzoi qeverinë për lidhje të thella me rrjete kriminale dhe korrupsion.
“Rama i ka shpallur luftë sistemit gjyqësor, dhe nëse vërtet duam të shpëtojmë Shqipërinë, duhet të largojmë Edi Ramën dhe ta shpallim armikun më të pamëshirshëm të shqiptarëve dhe të Shqipërisë,” tha konservatori, kryeministër nga 2005 deri në 2013.
Rama, i cili qeveris vendin që nga 2013, fitoi vitin e kaluar zgjedhjet parlamentare me shumicë absolute, duke siguruar një mandat të katërt radhazi.
Marrë nga France 24
