Emisari gjerman për Ballkanin Perëndimor, Manuel Sarrazin e ka cilësuar lëvizje pozitive heqjen e njëanshme të vizave nga Kosova për shtetasit e Bosnje e Hercegovinës. Lajmi u konfirmua ditën e djeshme nga kryeministri Albin Kurti gjatë samitit të Procesit të Berlinit ndërsa heqja e vizave do të hyjë në fuqi nga janari i vitit që vjen.
“Është pozitive dhe lëvizje e mirë nga Qeveria e Kosovës që t’i lejojë qytetarët e Bosnjës të lëvizin lirshëm në Kosovë. Ky është shpirti që promovon Procesi i Berlinit dhe shpresoj që përfaqësuesit e entitetit të Republikës Serbe të pajtohen rreth atyre që promovon Procesi i Berlinit”, tha Sarrazin.
Emisari gjerman tha se ky është shpirti që promovon Procesi i Berlinit, ndërsa shtoi se shpreson që përfaqësuesit e entitetit të Republikës Serbe të pajtohen rreth atyre që promovon Procesi i Berlinit. Ai më tej theksoi se evropianët nuk do të ndryshojnë qëndrim sa i përket sanksioneve ndaj Milorad Dodikut, kryetarit të Republikës Serbe në Bosnjë-Hercegovinë, për bllokimin e lëvizjes së lirë të qytetarëve të Kosovës në Bosnje e Hercegovinë.
Emisari i Gjermanisë i quajti domethënëse arritjet e samitit të Berlinit ku përfshihet plani i ri i veprimeve për tregun e përbashkët rajonal.
