Policia në kryeqytetin e Bullgarisë është përleshur me protestuesit nacionalistë të cilët po kërkojnë nga qeveria të heqë planet për ta futur vendin në eurozonë.
Rreth 1,000 protestues u mblodhën përpara zyrës së Komisionit Evropian në Sofje, degës ekzekutive të Bashkimit Evropian, dhe filluan të hedhin bojë të kuqe dhe fishekzjarre në ndërtesë.
Në vendngjarje janë nisur zjarrfikëset si dhe përforcime të policisë, të cilët kanë zmbrapsur protestuesit. Policia tha se disa demonstrues janë arrestuar, ndërsa disa oficerë janë plagosur gjatë përleshjeve.
Protesta, e organizuar nga nacionalistët pro-rusë të Partisë Vazrazhdane, filloi më herët të shtunën jashtë selisë së Bankës Kombëtare Bullgare.
Protestuesit kërkuan dorëheqjen e qeverisë, ndërsa valëvitnin flamuj kombëtarë dhe partiakë dhe brohoritnin “Jo euros” dhe “Po leve bullgare”, monedhës së vendit.
“Unë jam këtu për të mbrojtur Bullgarinë dhe popullin bullgar,” u tha gazetarëve kreu i Vazrazhdane Kostadin Kostadinov.
Ai tha se partia e tij po kërkonte një referendum për të vendosur për hyrjen në eurozonën 20-anëtare.
“Nëse nuk ka referendum, ne do të bllokojmë punën e Asamblesë Kombëtare”, tha Kostadinov, partia e të cilit është e treta më e madhe në parlament.
Bullgaria, e cila u bashkua me BE në 2007, është rrënuar nga paqëndrueshmëria politike gjatë disa viteve të fundit.
Qeveria e re, e formuar muajin e kaluar, e ka bërë anëtarësimin në eurozonë një prioritet kyç. Por jo të gjithë janë të bindur se Bullgaria është gati për t’u bashkuar me eurozonën.
Disa ekonomistë pohojnë se vendit i mungon një shkallë e pranueshme e kushteve ekonomike për t’u bashkuar me eurozonën dhe nuk është ende gati të adoptojë monedhën e përbashkët.
Marrë nga Newsbomb.al
