Reporterët Pa Kufij i është përgjigjur kryeministrit Rama lidhur me lirinë e shtypit në Shqipëri, pasi ky i fundit citoi raportin e një startup-i me Inteligjencë Artificiale që tregonte se zëri i opozitës dominonte hapësirën mediatike.
Organizata i thotë Ramës që ta investojë energjinë në adresimin e problemeve të lirisë së medias në Shqipëri, ndërsa shpreh gatishmërinë edhe për dialog.
“Kryeministër Edi Rama, në vend që të përpiqeni kot të provoni se indeksi i Reporters Without Borders (#RSFIndex) është i gabuar, ne propozojmë që energjia të investohet në adresimin e problemeve kronike të lirisë së medias në Shqipëri. Së bashku me partnerët e saj lokalë, RSF është e gatshme për një dialog mbi propozimet e saj”, shkruan Reporterët Pa Kufij në rrjetin X.
Nuk vonoi të vinte përgjigjja e kryeministrit, i cili shpreh habi për reagimin e organizatës kundrejt të dhënave.
Rama shkruan se qëllimi i tij s’ishte t’i provonte Reporterëve Pa Kufij që janë gabim, por të sillte informacione dhe fakte që në Shqipëri nuk ka “media të kapura”.
Më tej, mirëpriti ftesën për një dialog duke kërkuar “vendin dhe orën”, ndërsa përfundon duke thënë se afrimi me të vërtetën ka më shumë rëndësi.
Reagimi i Ramës:
“Pa asnjë vlerë? Uau. Ky është një reagim çuditërisht shpërfillës ndaj të dhënave që duken njëkohësisht të besueshme dhe shumë të rëndësishme.
Ju paraqiten të dhëna të verifikuara mirë, të cilat tregojnë se Shqipëria është 33 pikë përqindjeje poshtë pragut që zakonisht lidhet me sistemet mediatike “të kapura”, dhe megjithatë ju besoni se kjo nuk ka fare rëndësi?
Sinqerisht, qëllimi im këtu nuk ishte të provoja se e kishit gabim. Thjesht mendova se ia vlente të ndaja informacion shtesë të bazuar në fakte, duke supozuar se do të ishit të hapur ndaj burimeve objektive dhe të paanshme, edhe kur ato sfidojnë supozimet ekzistuese.
Gjithashtu besoja se mund të ishte inkurajuese të pranohej se Shqipëria mbetet mjaft larg përmbushjes së përkufizimit të një mjedisi mediatik “të kapur”, pavarësisht sfidave shumë reale që ende ekzistojnë në përmirësimin e standardeve të medias dhe në mbrojtjen e gazetarëve.
Unë nuk e kam vënë kurrë në dyshim rëndësinë e shqetësimeve të ngritura në planin tuaj udhëzues dhe do ta mirëprisja sinqerisht mundësinë për t’i diskutuar ato më tej me ju dhe partnerët tuaj vendorë në çdo kohë. Thjesht sugjeroni një datë dhe vend, dhe unë do të marr pjesë me kënaqësi, sepse prej vitesh kam shpresuar të angazhohem në atë lloj dialogu domethënës që ju thoni se e prisni me kënaqësi.
Në të njëjtën kohë, do t’ju inkurajoja të mos e shpërfillni evidencën empirike thjesht sepse ajo çon drejt një përfundimi tjetër. Madje mund t’ia vlejë të lidheni drejtpërdrejt me të rinjtë pas atij mjeti mbresëlënës të bazuar në inteligjencë artificiale dhe të shqyrtoni nëse ka hapësirë për bashkëpunim në forcimin e mëtejshëm të metodologjisë suaj.
Në fund të ditës, afrimi me të vërtetën ka më shumë rëndësi sesa kapja pas përfundimeve që mund të meritojnë rishqyrtim. Pres me kënaqësi të takohemi rreth një tryeze të rrumbullakët dhe, deri atëherë, do të vazhdoj të ndaj çdo gjetje të re që mund të kontribuojë në diskutim”, shkruan Rama.
Raporti i ‘Reporterëve Pa Kufij’ e rendit Shqipërinë në vendin e 83-të lidhur me lirinë e shtypit dhe transparencën e medias, duke pësuar rënie krahasuar me një vit më parë.
Rama u kundërpërgjigj duke publikuar raportin e SIGMA-OECD që vlerësonte Agjencinë për Media dhe Informim, por organizata tha më pas se “mat lirinë e medias, jo komunikimin e qeverisë.” Ajo ngriti shqetësime edhe për sulmet politike, kërcënimet ndaj gazetarëve dhe abuzimet me zbatimin e ligjit.
Më pas, kryeministri ndau edhe një raport të AMA-s që konfirmonte mbizotërimin e opozitës në hapësirën televizive. Për raportin e “Bulletin Intelligence” të publikuar së fundmi, Rama i tha organizatës se rrëzon tezën e tyre për media nën shërbim të qeverisë.
Marrë nga VoxNews.al
