Studentët universitarë protestues të Serbisë kanë mbledhur të dielën nënshkrime në të gjithë vendin për kërkesën e tyre për zgjedhje të parakohshme parlamentare, në të cilat shpresohet se do të rrëzohet qeveria autokratike e presidentit, Aleksandar Vuçiq nga detyra.
Studentët kanë ngritur gati 500 stenda në dhjetëra qytete, qyteza dhe fshatra në vendin ballkanik, në mënyrë që banorët të nënshkruanin kërkesën për zgjedhje.
Studentët kanë thënë se veprimi i së dielës ka për qëllim të ushtrojë presion të mëtejshëm mbi Vuçiqin dhe të jetë si një provë mbështetjeje.
Studentët kanë qenë në ballë të një lëvizjeje mbarëkombëtare kundër sundimit populist të Vuçiqit në Serbi. Më shumë se një vit protestash në rrugë filluan për herë të parë në nëntor 2024 pas një tragjedie në stacionin e trenit në Novi Sad që ka lënë të vdekur 16 persona.
Për rënien e strehës së betonit në qytetin verior të Novi Sadit u pa fajtor korrupsioni i përhapur dhe shpërfillja e rregullave të ndërtimit dhe sigurisë gjatë punimeve të rinovimit në stacion. Askush nuk është mbajtur përgjegjës për tragjedinë.
Vuçiqi ka refuzuar të caktojë zgjedhje të parakohshme, por ka sugjeruar se ato mund të mbahen diku vitin e ardhshëm. Zgjedhjet parlamentare dhe presidenciale janë planifikuar në vitin 2027.
Protestat e udhëhequra nga të rinjtë gjatë vitit të kaluar e kanë tronditur Vuçiqin më shumë se kurrë gjatë mandatit të tij 13-vjeçar. Kryeministri populist i Serbisë ka dhënë dorëheqjen në janar dhe Vuçiqi më vonë nisi një goditje ndaj protestuesve, veprim që tërhoqi edhe kritika ndërkombëtare.
Ndërsa protestat në rrugë janë qetësuar, pakënaqësia me qeverinë e Vuçiqit besohet të jetë e përhapur.
Milca Cankoviq Kadijeviq, një banore e Beogradit, ka thënë se i mbështeti studentët, sepse “kam dëshirë të jetoj mirë — unë, fëmijët e mi dhe nipërit e mbesat e mia”.
Vuçiqi ka premtuar zyrtarisht se do ta çojë Serbinë në Bashkimin Evropian, por ai ka mbajtur lidhje të ngushta me Rusinë dhe Kinën, ndërsa përballet me akuza për shtypjen e lirive demokratike dhe lejimin e lulëzimit të korrupsionit dhe krimit të organizuar.
Ai e ka mohuar këtë dhe i ka akuzuar protestuesit se po përpiqen të orkestrojnë një “revolucion me ngjyra” sipas urdhrave të paspecifikuara nga Perëndimi.
Termi “revolucion me ngjyra” është përdorur për të përshkruar një seri protestash masive në fillim të shekullit të 21-të që nganjëherë çuan në rrëzimin e qeverive në ish-shtetet e Bashkimit Sovjetik, ish-Jugosllavinë, Lindjen e Mesme dhe Azinë.
Marrë nga Associated Press
