Ditën e sotme është zhvilluar në Tiranë Konferenca për përgatitjen e zgjedhjeve të 11 majit. Në këtë takim ka marrë pjesë dhe ambasadori i prezencës së OSBE-së në Shqipëri Michel Tarran i cili tha se administrata zgjedhore t’i shërbejë interesit publik, jo atij politik. Tarran përsëriti angazhimin e Prezencës së OSBE-së për të mbështetur përpjekjet reformuese të Shqipërisë. Ai tha se viti i ardhshëm shënon gjithashtu një moment historik për Shqipërinë: votimin nga jashtë vendit.
“Një administratë zgjedhore e kualifikuar dhe e paanshme garanton që çdo votë të numërohet në mënyrë të drejtë dhe transparente. Me caktimin e ditës së zgjedhjeve për më 11 maj 2025, është koha për të mbështetur KQZ-në për zgjedhjet e ardhshme përmes një administrimi sa më profesional.
Sipas kornizës ligjore aktuale, procesi i emërimit të komisionerëve të administratës zgjedhore të nivelit të ulët është ekskluzivitet i partive politike. Megjithëse ky është një nga modelet e shumta që janë të zbatueshme në të gjithë zonën e OSBE-së, ajo që është kritike veçanërisht në mungesë të ndryshimeve ligjore të rekomanduara është t’i jepet përparësi meritës, përvojës dhe objektivitetit në përzgjedhjen e tyre.
Ne besojmë se kompetenca, pavarësia dhe paanshmëria duhet ta udhëheqin këtë proces për të siguruar që administrata zgjedhore t’i shërbejë interesit publik dhe jo atij politik. Për të arritur këtë, është e rëndësishme që i gjithë personeli i përfshirë në administratën zgjedhore t’i nënshtrohet një programi të unifikuar dhe gjithëpërfshirës trajnimi dhe certifikimi të ofruar nga Komisioni Qendror i Zgjedhjeve.
Viti i ardhshëm shënon gjithashtu një moment historik për Shqipërinë: votimin nga jashtë vendit. Ky është një hap i rëndësishëm përpara për të siguruar që qytetarët shqiptarë me të drejtë vote, pavarësisht ku jetojnë, të mund të votojnë. Ky zhvillim i ri sjell edhe sfida që administrata zgjedhore duhet të jetë e gatshme t’i adresojë”, tha ai.
