Presidenti i zgjedhur i SHBA-së, Donald Trump nisi të dielën një sulm të ri verbal kundër liderëve demokratë në Kaliforni, duke i akuzuar ata për paaftësi në menaxhimin e zjarreve shkatërruese në Los Angeles. Pas deklaratës së Trump, guvernatori reagoi duke e ftuar të shkonte atje.
“Zjarret janë ende të ndezura në Los Anxhelos. Të paaftët (politikanët) nuk e kanë idenë se si t’i fikin”, tha republikani, i cili do të ribetohet brenda një jave, përmes Truth Social.
“Kjo është një nga fatkeqësitë më të rënda në historinë e vendit tonë. Ata thjesht nuk mund të shuajnë zjarret. Çfarë nuk shkon me ta?”, shtoi ai.
“Mezi pres që ai të vijë këtu,” iu përgjigj guvernatori i Kalifornisë Gavin Newsom gjatë një interviste me NBC News ditën e djeshme.
Prej ditësh Newsom, 57 vjeç, i cili konsiderohet një operativ premtues demokrat, i ka bërë thirrje Donald Trump të shkojë në Los Anxhelos për të parë vetë dëmin dhe përpjekjet që po bëhen për të shuar zjarret shkatërruese.
Republikani ka bërë thirrje që guvernatori të japë dorëheqjen dhe javën e kaluar pretendoi se Kalifornia po përballet me mungesë uji për shkak të politikave të demokratëve për mbrojtjen e mjedisit dhe humbjes së ujit të shiut për të mbrojtur “peshqit e hedhurinave”.
Në fakt, sasia më e madhe e burimeve ujore të konsumuara në Los Anxhelos vjen nga lumi Kolorado, ai përdoret kryesisht për ujitjen e të korrave.
“Nuk mendoj se informacionet e pasakta dhe të rreme po na ndihmojnë dhe nëse do të gjeja kohë për t’iu përgjigjur fyerjeve të Donald Trump, me të cilat jam mësuar, do të më duhej një muaj”, tha dje me ashpërsi Gavin Newsom.
Shpejtësia me të cilën flakët u përhapën dhe intensiteti i tyre, i përkeqësuar nga erërat e forta, testoi rëndë sistemin e shuarjes së zjarrit dhe shkaktoi pikëpyetje dhe kritika të ashpra ndaj aparatit të gatishmërisë së shtetit. Mungesa e ujit në vende pengoi më tej përpjekjet për të kontrolluar flakët.
Zjarret shkatërruan më shumë se 12,000 ndërtesa në qendrën e dytë më të madhe urbane të SHBA-së, ndërsa numri i të vdekurve arriti në 16 të shtunën e kaluar. Ato kanë vazhduar të përhapen edhe ditën e djeshme dhe shqetësimin e ka shtuar edhe forcimi i mëtejshëm i erërave.
Marrë nga NBC News
