Deputetja socialiste Zamira Sinaj deklaroi ditën e djeshme në mbledhjen e Komisionit parlamentar për Turizmin se kompania e lidhur me dhëndrin e presidentit amerikan, Donald Trump, rrezikon të tërhiqet nga investimi në Ishullin e Sazanit, nëse Kuvendi nuk ndryshon ligjin për “Portet turistike”.
Përmes një amendamenti të dorëzuar në Kuvend, Sinaj ka iniciuar një nismë ligjore që synon dhënien e porteve turistike pa garë për investitorët strategjikë. “Sazani, rasti kryesor, janë duke u tërhequr,” tha ajo, duke iu përgjigjur pyetjes së kryetares së komisionit, Ina Zhupa, e cila kërkoi shembuj për të justifikuar nevojën e ndërhyrjes në ligj.
Deputetja theksoi se nëse nuk rregullohet procedura aktuale, investitori mund të largohet. Ajo iu referua një kërkese të dorëzuar pranë Komitetit të Investimeve Strategjike nga kompania e përfaqësuar nga Jared Kushner, dhëndri i Trump. Sinaj argumentoi se ndryshimi ligjor do të sigurojë “siguri juridike” për investitorët strategjikë, duke harmonizuar procedurat e ligjit për “Portet turistike” me ligjin për “Investimet Strategjike”.
Sipas deputetes, problemet kryesore në praktikë janë vonesat dhe bllokimet e investimeve të rëndësishme turistike. Ndryshimi i propozuar parashikon që një investitori strategjik që ndërton komplekse turistike në bregdet dhe përfshin edhe ndërtimin e një porti turistik, të mund t’i jepet pa garë koncesioni i ndërtimit dhe operimit të portit, gjë që ligji aktual e ndalon.
Sinaj shtoi se ndryshimi do të shmangë konflikte të mundshme midis investitorëve, në rast se ndërtimi i portit brenda një investimi strategjik mund ta fitojë një investitor tjetër dhe jo ai që ka marrë statusin e investitorit strategjik.
Kujtojmë se Jared Kushner mori miratimin nga Komiteti i Investimeve Strategjike për projektin e resortit turistik në Ishullin e Sazanit. Statusi i investitorit strategjik u dha për një periudhë 10-vjeçare, duke i siguruar projektit prioritet dhe procedura të përshpejtuara, në përputhje me planin e veprimit dhe detyrat e parashikuara në vendim.
Vendimi parashikon gjithashtu pjesëmarrjen e shtetit në investim përmes krijimit të një entiteti juridik të përbashkët, i përbërë nga Korporata e Investimeve Shqiptare (AIC), Albanian Seaports Development Company sh.a (ASDC) si pala shtet, dhe subjektit investues Atlantic Incubation Partners LLC, shoqëri me të drejtë amerikane.
Marrë nga Newsbomb.al
