Kosova ka reaguar ashpër pas informacioneve të publikuara nga Policia e Kosovës, sipas të cilave në zonën e Leposaviqit, në veri, një shtetas i Kosovës, pjesëtar i nacionalitetit serb, me inicialet M.V., dyshohet se fillimisht është plagosur dhe më pas është rrëmbyer nga Xhandarmëria Serbe. Policia thotë se ngjarja ka ndodhur më 01.11 brenda territorit të Kosovës, apo siç njihet (pika 0) në kufirin me Serbinë. Ende nuk ka deklarata nga autoritetet e Serbisë për këtë ngjarje.
Presidentja e Kosovës, Vjosa Osmani, në reagimin e saj, thotë se “bota demokratike duhet të reagojë e t’i ndalë këto sulme të Serbisë”. “Kjo është edhe një dëshmi shtesë e qasjes së saj hegjemoniste, ku çdo qytetar që guxon të flasë të vërtetën rreth regjimit autokratik të Vuçiqit, sulmohet dhe torturohet në mënyrën më barbare të mundshme. Bota demokratike duhet të reagojë e të ndalë këto sulme të Serbisë që kanë për qëllim rrezikimin e paqes e stabilitetit në rajonin tonë. Ndërkaq, skena politike në Kosovë duhet të veprojë e flasë në një zë në mbrojtjen e Kosovës nga tendenca të tilla”, tha Osmani.
Ministri në detyrë i Punëve të Brendshme të Kosovës, Xhelal Sveçla e quajti këtë si një veprim që është pjesë e politikave të Serbisë “për frikësim dhe përndjekje ndaj qytetarëve që nuk i binden regjimit të presidentit serb, Aleksandar Vuçiq”. “Kjo qasje agresive dhe provokuese e Serbisë është e papranueshme. Ajo përbën shkelje të rëndë të kufijve tanë shtetërorë dhe të të drejtave të qytetarëve tanë. I bëj thirrje faktorit ndërkombëtar që të reagojë ndaj Serbisë dhe që këto veprime armiqësore të mos përsëriten”, tha Sveçla në reagimin e tij.
KFOR: “Situata e sigurisë në vijën kufitare administrative me Serbinë është e qetë”
Kurse Policia e Kosovës thotë se është duke bashkëpunuar me forcat paqeruajtëse të KFOR-it për të zbardhur këtë rast. Zona ku ndodhi plagosja është zonë e përgjegjësisë së KFOR-it. KFOR është në dijeni rreth njoftimit të Policisë së Kosovës dhe siguron bashkëpunimin me të. “Situata e sigurisë në vijën kufitare administrative me Serbinë është e qetë”, ka deklaruar KFOR. “Policia e Kosovës ka nisur hetime dhe vazhdon të jetë në kontakt të ngushtë me disa entitete, përfshirë KFOR-in. Policia e Kosovës e ka koordinuar aktivitetin e vet në anën kosovare të vijës kufitare administrative me KFOR-in.”
Të maskuar hyjnë në territorin e Kosovës
Sipas informacioneve të Policisë së Kosovës, viktima është plagosur nga Xhandarmëria serbe dhe është identifikuar me inicialet M.V. Sipas dëshmitarëve, pas plagosjes ai është dërguar me një autoambulancë në drejtim të qytetit të Nishit, në Serbi. Policia tha se ka intervistuar disa dëshmitarë okularë dhe përmes tyre ka siguruar informacion se “persona të maskuar kishin hyrë në territorin e Kosovës, duke e plagosur dhe rrëmbyer viktimën, të cilët pastaj e kishin dërguar në territorin e Serbisë”.
Informacionet e para lidhur me plagosjen e serbit M.V. i bëri publike një avokat serb, Ivan Niniq, në Serbi. Ai shkroi në platformën X se viktima M. V. ishte plagosur rëndë gjatë të shtënave në fshatin Jellakcë, afër Leposaviqit, dhe se mjekët në Qendrën Klinike Universitare në Nish po tentojnë t’ia shpëtojnë jetën.
Nuk është hera e parë që autoritetet e Kosovës akuzojnë Serbinë se Xhandarmëria serbe hyn në territorin e Kosovës. Në mars të vitit 2012, dy policë të Kosovës ishin arrestuar në fshatin Dumnicë të Podujevës nga Xhandarmëria serbe, por më pas ishin liruar. Edhe në vitin 2023, tre policë të Kosovës, duke patrulluar pranë fshatit Bare, në veri të Kosovës, u arrestuan nga policia e Serbisë, me pretendimin se ata kishin kaluar në territorin e Serbisë. Pas 48 orësh edhe këta tre policë u liruan.
Marrë nga Deutsche Welle
