Ministrja e Arsimit, Mirela Kumbaro, bëri të ditur situatën në shkollat e vendit gjatë mbledhjes së Emergjencave Civile, duke theksuar se moti i keq ka sjellë ndërprerje të përkohshme të mësimit në disa zona.
Gjatë fjalës së saj, ajo theksoi se në total janë 54 shkolla ku mësimi është pezulluar për arsye sigurie, kryesisht në qarkun e Durrësit, në zona si Kruja, Sukthi, Katundi i Ri, por edhe në qarqet e Fierit, Gjirokastrës dhe Vlorës.
Gjithashtu Kumbaro u shpreh se mësimi është ndërprerë edhe në Universitetin “Aleksandër Moisiu” të Durrësit, për shkak të vështirësive në akses.
“Në të gjithë qarkun e Tiranës mësimi ka filluar rregullisht në të gjitha shkollat. Kemi në qarkun e Durrësit një ndërprerje të përkohshme në 12 shkolla, më së shumti në Krujë, Sukth, Katund i Ri dhe Durrës. Në Universitetin “Aleksandër Moisiu” të Durrësit është ndërprerë mësimi këto dy tre ditë, pasi aksesi ka qenë i vështirë, por falë bashkëpunimit me Forcat e Armatosura situata po kthehet në normalitet. Janë njoftuar të gjithë studentët që të hënën mësimi do të fillojë normalisht.Në qarkun e Dibrës mësimi vazhdon gjithashtu normalisht. Në qarqet e Lezhës dhe të Shkodrës gjithçka është në rregull dhe mësimi ka filluar edhe sot normalisht në të gjitha shkollat.
Më problematike është situata në qarqet e Vlorës, Gjirokastrës dhe Fierit, ku kemi rreth 10 shkolla. Sot kemi pasur ndërprerje të përkohshme të kontrolluara këtë e bëjmë për arsye sigurie. Jemi në kontakt me të gjithë mësuesit dhe me të gjithë prindërit, por edhe me mësuesit që duhet të bëjnë rrugë drejt zonave më të thella. Ndërprerja është bërë në zona të thella, në fshatra dhe në shkolla të vogla. Nga 1510 shkolla, në 54 shkolla mësimi është ndërprerë,” u shpreh Mirela Kumbaro.
Marrë nga Newsbomb.al
