Historia është shkruar në asfaltin e pistës së Motegit.
Me këtë triumf, Márquez barazon legjendën Valentino Rossi, duke hyrë në një klub ekskluziv që pak veta në histori kanë pasur privilegjin të prekin. Por spanjolli i Ducati-t vendos edhe një tjetër rekord: bëhet piloti i parë që fiton një titull bote më shumë se pesë vjet pas fitores së tij të fundit, që datonte në vitin 2019.
14 podiume në 17 gara Sprint;
11 fitore në total;
Vetëm dy gara pa pikë (tërheqje në Austin dhe vendi i 12-të në Jerez).
Këto rezultate e bënë pothuajse të pamundur për rivalët ta ndalonin në garën për titull, përfshirë edhe vëllain e tij, Alex Márquez, i cili përfundoi në vendin e 6-të në Motegi dhe matematikisht doli jashtë luftës për kampion.
Fitorja në Japoni i takoi një Francesco “Pecco” Bagnaias të rilindur, i cili përmbylli një fundjavë perfekte pas suksesit në Sprint-in e së shtunës. Pavarësisht problemeve me motorin dhe retë e bardha të tymit që dilnin nga Ducati i tij në çdo kthesë, kampioni në fuqi arriti të qëndronte i qetë dhe të rikthehej te fitorja e madhe pas një sezoni të vështirë.
Podiumi u plotësua nga Joan Mir me Honda, që rikthehet në podium pas katër vitesh mungesë, ndërsa Marco Bezzecchi (Aprilia) dhe Franco Morbidelli (Ducati VR46) përfunduan në vendet 4 dhe 5.
Nuk ishte një fundjavë e lehtë për Enea Bastianinin dhe Fabio Di Giannantonio, që mbyllën garën në vendin e 11-të dhe të 13-të. Luca Marini u detyrua të tërhiqej pas vetëm disa xhirosh për shkak të problemeve teknike.
Rikthimi i Márquez në majën e botës vjen pas vitesh të vështira të shoqëruara nga dëmtime, ndërhyrje kirurgjikale dhe kritika. Por kampioni spanjoll ka dëshmuar se ende ka shumë për të dhënë dhe se emri i tij është i gdhendur në historinë e MotoGP-së krah legjendave si Valentino Rossi.
Marrë nga Top Channel
