Harta e ndërtimeve luksoze në bregdetin e jugut po zgjerohet me ritme alarmante, por pas shkëlqimit të betonit në Potam të Himarës fshihet një skemë e dyshimtë që ngre pyetje të forta mbi burimin e financimit dhe rolin e institucioneve shtetërore.
Në qendër të këtij skandali është kompania “Eldino” Sh.p.k., një firmë që në letër zotërohet nga një e re 23-vjeçare nga Ballshi, Gabriela Dino, por që në realitet flitet se do të sigurojë leje për ndërtimin e gjashtë kullave gjigante 16-katëshe në një prej zonave më të lakmueshme të bregdetit.
Dyshimet nisin që te stabiliteti financiar i kompanisë në fjalë. “Eldino” u themelua në vitin 2013 me një kapital qesharak prej vetëm 100 mijë lekësh nga Ervin Luari, një personazh me historik problematik.
Megjithëse kompania regjistronte bilance me humbje, ajo u ble në vitin 2015 nga Gabriela Dino për të njëjtën vlerë modeste. Ironia qëndron në faktin se pronarja e re, e cila zyrtarisht figuron si ekonomiste me një pagë mujore prej 60 mijë lekësh, sot drejton projekte që kapin vlerën e miliona eurove. Kjo mospërputhje flagrante mes të ardhurave të deklaruara dhe volumit të ndërtimeve ngre pikëpyetje se kush janë financuesit realë që qëndrojnë në hije.
Rruga e “Eldino” drejt suksesit duket se është shtruar me firma zyrtare nga nivelet më të larta të pushtetit. Kryeministri Edi Rama, në cilësinë e Kryetarit të Këshillit Kombëtar të Territorit, pritet të firmosë lejet për projektin në Potam, i cili përfshin gjashtë objekte me 16 kate mbi tokë dhe 4 kate nëntokë.
Përveç këtyre, kompania ka marrë “bekimin” qeveritar edhe për dy objekte të tjera në po të njëjtin fshat bregdetar përmes vendimeve të vitit 2024 dhe 2025, të bashkëfirmosura me ministra si Mirela Kumbaro dhe Blendi Gonxhe. Ky favorizim i një kompanie pa kapital të mjaftueshëm dhe me bilance negative sugjeron një rrjet të fuqishëm influencash që operon larg syrit të publikut.
Por shtrirja e kësaj kompanie nuk ndalet vetëm në jug. Në Tiranë, “Eldino” është bërë pjesë e një projekti madhor te Diga e Liqenit.
Së bashku, ata po ndërtojnë kompleksin “Tirana Lake” me pesë kulla 17-katëshe mbi një sipërfaqe prej mbi 32 mijë metrash katrorë tokë publike. Edhe në këtë rast, burimi i miliona eurove të investuara mbetet një mister i pazgjidhur, ndërkohë që institucionet tatimore dhe ato të kontrollit duket se kanë mbyllur sytë përballë këtij qarkullimi masiv kapitalesh të pajustifikuara.
Në prapaskenë shfaqet edhe figura e babait të Gabrielës, Abaz Dino, një emër i njohur për drejtësinë. Sipas dosjeve të SPAK-ut, Abaz Dino është përfshirë në falsifikim letrash dhe pastrim parash, duke u shfaqur si “biznesmen ndërtimi” në transaksione të dyshimta me ish-zyrtarë të lartë të policisë.
Skema e tjetërsimit të pasurive përmes kompanisë “Dino Partners”, ku vlera miliarda lekëshe kalonin nga babai te vajza brenda pak ditësh pa deklaruar origjinën, përforcon dyshimet për një makineri të mirëfilltë pastrimi parash.
Sot, ndërsa kullat lartësohen në Potam dhe te Liqeni i Tiranës, mbetet një sfidë e hapur për Strukturën e Posaçme Antikorrupsion (SPAK).
A do të ketë një hetim të thelluar për të zbuluar nëse këto kulla janë monumente të korrupsionit dhe krimit ekonomik, apo shteti do të vazhdojë të lejojë që bregdeti të shndërrohet në një lavatriçe gjigante për paratë e pista?
Marrë nga JOQ
