Një grup që trafikonte vajza nga Azia Qendrore dhe Amerika Latine në Shqipëri me qëllim shfrytëzimin e tyre për prostitucion është goditur nga Seksioni për Hetimin e Trafiqeve në Tiranë, në bashkëpunim me Prokurorinë dhe Policinë Kombëtare të Kolumbisë, Policinë kroate, EUROPOL dhe EUROJUST.
Në kuadër të operacionit “Rrjeti”, u ekzekutuan 9 masa në Shqipëri, 10 në Kolumbi dhe 3 persona u shpallën në kërkim.
Në vendin tonë u arrestuan, Assel Adrysheva, Rostyslav Mieshkov, Denis Berisha, Mirel Shpërdheja, Dritan Sukaj, Ilmar Gugashi dhe Kejvin Ndreu, ndërsa 48 vajza të huaja janë vënë në hetim për ushtrim prostitucioni.
Hetimi për shkatërrimin e këtij grupi nisi që në muajin shkurt 2025.
Koka e grupit, kolumbiani Lukas Betancur kishte rolin kryesor në rekrutimin e vajzave nga vendet e Amerikës Latine, duke u organizuar atyre udhëtimin dhe akomodimin në vendin tonë, ku më pas ushtronin edhe prostitucionin.
Në rastet kur vajzat refuzonin ose kërkonin të largoheshin, ato kërcënoheshin me familjarët e tyre në Kolumbi.
Krahu i djathtë i kolumbianit në vendin tonë ishte Dritan Sukaj, ku menaxhonte rrjetin e prostitucionit.
Gjatë operacionit është zhbuluar edhe një hotel në rrugën “Reshit Çollaku” në kryeqytet, që përdorej për ushtrimin e prostitucionit.
Ndërkohë, dy prej të arrestuarve, Assel Adrysheva dhe Kejvin Ndreu ishin tutrorët e disa vajzave nga Kazakistani dhe i strehonin në këtë hotel.
Ndërsa, anëtari tjetër i grupit Denis Berisha u jepte drogë vajzave që ushtronin prostitucion e u gjente klientë.
Ndërkohë janë sekuestruar edhe shuma parash, 7 celularë dhe prova të tjera të vlefshme për hetimin.
Marrë nga Dosja.al
