Interi vazhdon me ritëm perfekt në Serie A, por këtë herë iu desh një përmbysje spektakolare për të marrë tri pikët. Zikaltrit mposhtën 5-3 Udinesen në “San Siro”, pas një ndeshjeje me plot tetë gola.
Udinese befasoi vendasit që në minutat e para. James Abankwah shënoi me kokë pas një krosimi të Unai Gómez dhe u dha miqve avantazhin. Interi reagoi, por Maduka Okoye bëri një pritje të dyfishtë fantastike ndaj Marcus Thuram.
Skuadra e Cristian Chivu u trondit edhe më shumë në minutën e 16-të, kur Jurgen Ekkelenkamp dyfishoi epërsinë e Udineses pas një pasimi të zgjuar nga Keinan Davis. Megjithatë, Interi nuk u dorëzua. Carlos Augusto shënoi një gol spektakolar nga distanca në minutën e 26-të, ndërsa Nicolò Barella barazoi shifrat para pushimit.
Në pjesën e dytë, Interi përmbysi gjithçka. Marcus Thuram shënoi 3-2 pas asistimit të Andy Diouf, ndërsa Pio Esposito realizoi golin e katërt pas pasimit të Piotr Zielinskit.
Pak më vonë, Ange-Yoan Bonny vulosi fitoren me golin e pestë, pasi realizoi edhe pas një tentative të parë të ndalur nga Okoye. Udinese gjeti një tjetër gol në shtesë me Idrissa Gueye, por pa ndryshuar fatin e takimit.
Me këtë fitore, Interi ngjitet në vendin e dytë me pikë të plota dhe tashmë pret një përballje të madhe me Romën. Marcus Thuram u shpall lojtari i ndeshjes.
Marrë nga SuperSport.al
