Familjarët e krerëve të UÇK-së janë duke pritur për të hyrë brenda Gjykatës Speciale në Hagë, ku do të jepet verdikti final i shkallës së parë për Hashim Thaçin, Kadri Veselin, Jakup Krasniqin dhe Rexhep Selimin.
Veç tyre, ka edhe shumë familjarë të tjerë që po presin për të hyrë në Galerinë e Publikut për të parë nga afër seancën më të rëndësishme për katërshen e UÇK-së.
Prej mbrëmjes së djeshme qindra shqiptarë u mblodhën pak metra larg Gjykatës Speciale, në përkrahje të krerëve të UÇK-së dhe sot presin ende në shesh për verdiktin final.
Edhe në Prishtinë, qytetarë të shumtë zbardhën natën në sheshin “Skënderbeu” në Prishtinë, për të pritur vendimin përfundimtar për çlirimtarët.
Po ashtu, mbrëmë është vendosur “Ora e Pritjes”, si e fundit përpara vendimit të madh.
Gjithashtu edhe në Skënderaj dhe në komuna të tjera të Kosovës janë mbledhur qytetarë për ta pritur verdiktin e Dhomave të Specializuara.
