Vera është një nga produktet më të përdorura në tryezat shqiptare, sidomos në festime apo mbledhje me miq. Por përtej simbolikës dhe kulturës së konsumit, ajo mbart një kosto jo të vogël – veçanërisht në kryeqytet.
Sipas të dhënave të platformës Numbeo, një shishe vere e kategorisë së mesme në Tiranë kushton mesatarisht 10.14 euro, çka e rendit atë në vendin e 21-të nga 138 qytete të botës dhe ndër më të shtrenjtët në Europë për këtë produkt.
Në krahasim me rajonin, Shqipëria mban kryesimin për çmimin më të lartë të verës. Pas Tiranës vjen Sarajeva me 7.12 euro (vendi i 43-të), Beogradi me 6.37 euro (vendi i 62-të) dhe Shkupi me 5.69 euro (vendi i 104-t). Prishtina dhe Podgorica rezultojnë ndër më të lirat në rajon, me çmime përkatësisht 5.05 dhe 5.00 euro për shishe, duke u renditur në vendin e 125-të dhe 114-t.
Në fund të listës ndodhen qytete si Roma dhe dy qytete portugeze, ku më i liri është Porto, me vetëm 4 euro për një shishe vere të kategorisë së mesme.
Marrë nga Scantv.al
