Shqipëria vijon të humbasë popullsi, ndërsa emigracioni mbetet faktori kryesor që po e thellon tkurrjen demografike të vendit.
Sipas të dhënave të INSTAT, popullsia e Shqipërisë më 1 janar 2026 rezultoi 2.335.930 banorë, me një rënie prej 1,16 për qind krahasuar me 1 janar 2025.
Tkurrja e popullsisë gjatë vitit 2025 është ndikuar nga dy komponentë kryesorë demografikë. Shtesa natyrore ka qenë pozitive, me 1.147 lindje më shumë se vdekje, por ky bilanc është zbehur plotësisht nga migracioni neto, i cili ka mbetur negativ në nivelin 28.531 persona.
Kjo do të thotë se vetëm gjatë vitit 2025 nga Shqipëria është larguar neto një popullsi e krahasueshme me një qytet sa Kavaja.
Të dhënat tregojnë se vendi nuk po humbet popullsi për shkak të bilancit natyror, pasi lindjet vijojnë të jenë më të larta se vdekjet, por për shkak të largimit të qytetarëve jashtë vendit. Migracioni neto negativ ka qenë disa herë më i lartë se shtesa natyrore pozitive, duke e çuar popullsinë në rënie të mëtejshme.
Në të njëjtën kohë, treguesit demografikë dëshmojnë edhe plakjen e mëtejshme të popullsisë. Mosha mediane është rritur nga 44,3 vjeç më 1 janar 2025 në 45 vjeç më 1 janar 2026.
Raporti i varësisë së të moshuarve është rritur gjithashtu, nga 33,3 për qind në 35,7 për qind, ndërsa raporti i varësisë së përgjithshme është rritur nga 57,1 për qind në 59,4 për qind. Kjo tregon se pesha e popullsisë joaktive mbi atë në moshë pune po bëhet më e rëndë.
Për vitin 2025, në Shqipëri janë regjistruar 22.541 lindje dhe 21.394 vdekje. Raporti gjinor në lindje ka mbetur pothuajse i pandryshuar krahasuar me vitin paraardhës, me 107,9 meshkuj për 100 femra.
Në nivel qarqesh, vetëm Tirana ka shënuar rritje të popullsisë krahasuar me një vit më parë, me 0,7 për qind. Të gjitha qarqet e tjera kanë pësuar rënie.
Uljet më të mëdha janë regjistruar në Kukës, me 2,59 për qind, dhe në Shkodër, me 2,56 për qind.
Tirana vijon të përqendrojë pjesën më të madhe të popullsisë së vendit. Më 1 janar 2026, qarku i Tiranës zinte rreth 32,8 për qind të popullsisë gjithsej, duke mbetur qarku më i populluar në Shqipëri.
Pas Tiranës renditen Fieri, Elbasani dhe Durrësi, me përkatësisht 9,7 për qind, 9,5 për qind dhe 9,4 për qind të popullsisë së vendit.
Të dhënat e reja konfirmojnë se Shqipëria po përballet njëkohësisht me dy procese të forta demografike: largimin e vazhdueshëm të popullsisë dhe plakjen e saj.
Marrë nga Skyweb.al
