Bodø/Glimt derdh lot të hidhura, ndërsa Sporting feston kualifikimin në çerekfinalet e Champions League dhe Interi “i bie kokës me grusht”. Ndeshja e kthimit në Portugali na dhuron një arritje të madhe. “Luanët” jo vetëm që përmbysin humbjen e ndeshjes së parë (3-0), por fitojnë 5-0 dhe kalojnë turin. Golat e Gonçalo Inácio (36’), Pedro Gonçalves (61’) dhe Suárez (78’) mbyllin përmbysjen. Ndërsa Araujo (92’) dhe Rafa Nel (121’) vulosin kualifikimin.
Ndodh e pabesueshmja në Estadio José Alvalade, që na dhuron një përmbysje të bujshme. Sporting mposht 4-0 Bodø/Glimt dhe shkon në çerekfinale. Norvegjezët, që kishin eliminuar Interin, nisnin nga avantazhi trefish i ndeshjes së parë. Por goditen menjëherë nga qasja agresive e kundërshtarit. Sporting nuk kufizohet vetëm në presion, por e nis ndeshjen në mënyrë spektakolare. Nëntë goditje në njëzet minuta, me raste të dyfishta për Suárez dhe Pedro Gonçalves.
Megjithatë, për golin duhet pritur minuta e 34’. Krosim i Trincão, goditje me kokë e Gonçalo Inácio dhe 1-0. Bodø reagon dhe godet shtyllën (dy herë) me Bjortuft, më pas mbyllet në mbrojtje. Nuk është qasja e duhur, pasi Sporting krijon raste të shumta dhe shënon sërish në minutën e 61’: asist i Suárez, 2-0 nga Pedro Gonçalves. Knutsen zëvendëson yjet e tij, të gjithë nën nivel, dhe skuadra bie në minutën e 78’. Penallti (e diskutueshme) për një prekje me dorë nga Bjørkan, Suárez realizon për 3-0. Rezultati barazohet në total dhe shtesat bëhen realitet.
Bodø tashmë dorëzohet nën presion dhe pëson menjëherë, me golin e katërt nga Araujo (92’). Ndërsa Hjulmand shpëton mbi vijë një gol që do të ndryshonte gjithçka. Norvegjezët tentojnë sulmin e fundit, por janë konfuzë dhe ndëshkohen sërish. Debutuesi Rafa Nel shënon për 5-0 (121’). Sporting avancon dhe bën histori. Kualifikimi i parë në çerekfinalet e Champions League në epokën moderne, pasi i vetmi precedent datonte nga Kupa e vjetër e Kampionëve (1982/83).
Marrë nga Lapsi.al
