Real Madridi e nisi me këmbën e mbarë gjysmëfinalen e “Copa del Rey”, me një ndeshje tepër të luftuar, ku portierët Remiro dhe Lunin bënë disa pritje vendimtare. Real Sociedad u mposht në shtëpi me rezultatin 1-0 falë një goli të Endrick në minutën e 19-të, i cili ishte shumë pranë kompletimit të ‘dopietës’ personale. Tashmë, gjithçka mbetet e hapur për ndeshjen e kthimit.
Pas ndeshjes, trajneri i Real Madridit, Carlo Ancelotti, duke analizuar performancën e skuadrës, u shpreh: “Është në një gjendje shumë të mirë. Bëmë disa ndryshime, por skuadra ruajti soliditetin, ishte kompakte dhe e bashkuar. Mendoj se po bëjmë mirë pavarësisht ndryshimeve që kemi pasur. Endrick dha shumë, shënoi një gol fantastik, ndërsa Arda punoi shumë mirë në rolin e tij, sidomos në aspektin mbrojtës”.
