Pritje e madhe në Angli për seancën kundër Manchester Cityt, për 115 shkeljet e pretenduara të rregullave ekonomiko-financiare të Premierligës vazhdon…
Sipas Times, puna e komisionit të pavarur është çuar përpara nga nëntori deri në mes ose në fund të shtatorit, me një vendim që pritet në fillim të vitit 2025. Nëse do të vërtetoheshin akuzat më serioze, City do të rrezikonte rënien nga kategoria.
Ndër shkeljet e supozuara janë dështimi për të dhënë informacion të saktë financiar për 9 sezone, detaje jo të plota të pagesave ndaj Roberto Mancinit midis 2009 dhe 2013 dhe detaje jo të plota të pagesave për lojtarë të ndryshëm nga 2010/11 deri në 2015/16.
Klubi gjithmonë ka mohuar çdo akuzë, duke thënë se ka “prova të pa kundërshtueshme” që do ta shfajësojnë atë.
Hetimi filloi në vitin 2018 kur, si pjesë e të ashtuquajturave Football Leaks, gazeta gjermane Der Spiegel, publikoi dokumente të ndjeshme që sugjeronin se si pronarët e Cityt kishin paguar drejtpërdrejt paratë që duhet të kishin ardhur nga kontratat e sponsorizimit.
