Të ardhmen e pankinës zikaltër po e vendos pikërisht ai që ka udhëhequr Interin në sukseset më të mëdha europiane të dekadës së fundit: Simone Inzaghi. Pas humbjes në finalen e Ligës së Kampionëve ndaj PSG-së, situata mbetet e paqartë. Klubi, i drejtuar nga Beppe Marotta, ka planifikuar një takim vendimtar me trajnerin për të përcaktuar rrugën që do të ndiqet në sezonin e ardhshëm.
Inzaghi ka në dorë një ofertë rinovimi deri në vitin 2027 me një rritje të lehtë page, por gjithsesi shumë larg nga shifrat marramendëse që i ka vënë në tavolinë Al Hilal nga Arabia Saudite. Klubi nuk ka ndërmend ta shkarkojë trajnerin pas arritjeve të tij: dy finale të Champions në tri vite, një titull kampion dhe stabilitet konstant në majat e Serisë A. Por trajneri kërkon garanci për projektin teknik dhe investime konkrete në skuadër.
Koha nuk pret. Interi do të nisë fushatën në Botërorin për Klube në SHBA më 18 qershor dhe dëshiron të ketë që tani të qartë drejtimin teknik. Marotta kërkon një përgjigje të qartë dhe në rast se Inzaghi vendos të largohet, ai do të marrë mbi vete përgjegjësinë e ndarjes.
Ndërkohë, klubi ka nisur sondazhet për një zëvendësues të mundshëm. Fabregas është një emër që pëlqehet, por ka rinovuar me Como-n. De Zerbi ka deklaruar se qëndron te Marseille. Kandidatë të tjerë me të kaluar zikaltër si Chivu dhe Vieira janë gjithashtu në listë. Vendimi i Inzaghi-t do të jetë çelësi për të ardhmen: rinovim dhe vazhdim i ciklit, apo fund i një epoke me shije të ëmbël e të hidhur njëkohësisht.
Marrë nga SportMediaset.it
