60 punonjës të Ndërmarrjes së Gjelbërimit dolën dje në protestë përpara Bashkisë së Vlorës, për shkak të shkrirjes së dy drejtorive, asaj të Pastrimit dhe Gjelbërimit, në një të vetme. Sipas punonjësve të gjelbërimit, kontrata e re i detyron ata të kryejnë edhe punët e pastrimit, në të kundërt rrezikojnë largimin nga puna.
Një pjesë e punonjësve kanë zhvilluar një takim dhe me prefekten e qarkut të Vlorës, Evis Allushi, të cilës i kanë shprehur pakënaqësitë e tyre, në lidhje me vendimin që është marrë.
“Unë kam lindur e majtë, e kam pasur xhaxhain 12 vite kryetar këshilli, dhe mua nuk më flakin dot në rrugë patronazhistët. Po na bëhet presion psikologjik, zonja prefekte, a keni qenë pushim ju në datën 31 dhe 1, dhe unë kam qenë në punë, dhe nuk më paguhet, me çfarë të drejte. Po të marr shembull me kohën e Enver Hoxhës, unë nëse dilja në punë në ditët e pushimit, paguhesha 150%. Në këtë kontratë nuk flitet fare për gjelbërimin, tani ka më shumë punë se në verë. Ka leshterikët, ka barishtet e këqija. Tani nuk shikoj asnjë gjë, në rrugë, kam ardhur me respektin më të madh, ndryshe ne jemi të detyruar që të shkojmë te kryeministri. Në këtë gjendje që është sot vendi, ju kërkoni që të ktheni dhe vlonjatët kundër?”, shprehet një prej punonjësve të Gjelbërimit.
Punonjësit shprehen se, sipas kushteve të reja, duhet të jenë në gatishmëri 24 orë, për situata të ndryshme, ndërkohë që theksojnë se nuk e kanë parë dhe as nuk u është prezantuar zyrtarisht kontrata e re.
Punonjësit deklarojnë se do të vijojnë protestën dhe nuk do të rikthehen në punë deri në arritjen e një marrëveshjeje. Ata shprehen se janë të kërcënuar me largim nga puna, nëse nuk pranojnë kushtet e reja të kontratës.
Marrë nga Zëri.al
