Agjencitë më të mëdha të lajmeve i kanë kushtuar vëmendje protestës së opozitës të shtunën në qendër të Tiranës dhe incidenteve që pasuan.
“Demonstruesit akuzuan kryeministrin socialist Edi Rama për korrupsion dhe kërkuan që ai të jepte dorëheqjen. Protesta u drejtua nga lideri i opozitës dhe ish-kryeministri Sali Berisha. Ai u bëri thirrje mijëra njerëzve që u mblodhën para ndërtesës kryesore të qeverisë së Tiranës të “bashkohen për të rrëzuar këtë qeveri dhe për të krijuar një qeveri teknike për të përgatitur zgjedhje të parakohshme, të lira dhe të ndershme” – shkruan Euronews.
Rrjeti i njohur evropian i lajmeve shkruan se pas mbajtjes së fjalimeve, disa protestues hodhën kokteje molotov drejt policisë, e cila nga ana tjetër u përgjigj me gaz lotsjellës dhe topa uji për të shpërndarë turmën.
“Më shumë përleshje pati kur grupe protestuesish marshuan drejt parlamentit, ku u përpoqën të thyenin kordonet e policisë, duke hedhur gurë dhe kokteje Molotov. Policia u përgjigj përsëri me gaz lotsjellës dhe topa uji. Të paktën 10 oficerë pësuan lëndime të lehta, tha një deklaratë e policisë” – shkruan Euronews.
Në shkrim citohet Berisha sipas të cilit, 25 protestues u arrestuan. “Ky është kilometri i fundit drejt fundit të regjimit të Edi Ramës”, tha ai në një fjalim pas tubimit jashtë selisë së partisë së tij, Partisë Demokratike të krahut të djathtë.
“Protestat u zhvilluan në një moment kur partitë e krahut të majtë dhe të djathtë po shkëmbejnë akuza për korrupsion dhe lidhje me krimin e organizuar. Në nëntor, një gjykatë korrupsioni pezulloi zëvendëskryeministren Belinda Balluku, e cila është një aleate e ngushtë e Ramës, për rolin e saj të dyshuar në një rast korrupsioni në prokurimin publik.
Balluku, gjithashtu ministre e infrastrukturës dhe energjisë, i ka mohuar akuzat, ndërsa Rama e quajti pezullimin e saj një “akt brutal ndërhyrjeje në pavarësinë e ekzekutivit”. E adresuar nga qeveria, Gjykata Kushtetuese në dhjetor e riktheu përkohësisht Ballukun në pozicionin e saj në pritje të vendimit përfundimtar.
Të mërkurën e ardhshme, një komision parlamentar do të shqyrtojë një kërkesë nga prokurorët e korrupsionit dhe krimit të organizuar për të hequr imunitetin e saj, gjë që do të mundësonte arrestimin e saj. Në të njëjtën kohë, vetë Berisha dyshohet se u ka dhënë kontrata publike bashkëpunëtorëve të tij, pretendime të cilat ai i mohon fuqimisht” – shkruan Euronews.
Ndërsa agjencia tjetër AFP, pasi bën një panoramë të asaj që ka ndodhur, shkruan se krimi i organizuar dhe korrupsioni janë çështjet kryesore që e pengojnë Shqipërinë të anëtarësohet në Bashkimin Europian.
“Kryetari i Bashkisë së Tiranës, Erion Veliaj, u arrestua në shkurt të vitit të kaluar nën dyshimet për korrupsion dhe pastrim parash. Dy ish-ministra të tjerë që kanë shërbyer nën qeverinë Rama janë akuzuar për përvetësim fondesh dhe shpërdorim detyre. Ish-kryeministri dhe ish-presidenti Ilir Meta u arrestua në tetor 2024, gjithashtu nën akuzat për korrupsion dhe pastrim parash” – shkruan AFP.
Lajmin e ka pasqyruar edhe agjencia e lajmeve “Reuters” që ka publikuar foto nga ajo që ndodhi para kryeministrisë. Reuters shkruan se mbështetësit e opozitës shqiptare mbajtën lart dritat e telefonave gjatë një proteste antiqeveritare, të nxitur nga një hetim për korrupsion ndaj zëvendëskryeministres Belinda Balluku.
Jehonë lajmit i ka bërë edhe agjencia e njohur aziatike e lajmeve “Al Jazeera”. Ajo shkruan se “përleshjet shpërthyen mes policisë dhe protestuesve të opozitës në kryeqytetin e Shqipërisë për shkak të dyshimeve mbi korrupsionin e qeverisë së Partisë Socialiste. Demonstruesit kërkuan dorëheqjen e kryeministrit Edi Rama”.
“Protestuesit hodhën bomba molotov ndaj parlamentit të Shqipërisë” shkruan media britanike “Sky News”.
“Një protestë e organizuar u shndërrua në dhunë të shtunën kur demonstruesit filluan të hidhnin bomba molotov në drejtim të oficerëve dhe ndërtesës së parlamentit në Shqipëri, duke shkaktuar shpërthime” – shkruan Sky News.
Protestat në Tiranë janë bërë lajme dhe në mediat gjermane. “Trazira gjatë protestave antiqeveritare në Shqipëri shkruan e përditshmja “Frankfurter Allgemeine Zeitung”.
Marrë nga Lapsi.al
