Edi Rama dhe Kanye West janë mësuar me vërshëllimat dhe kundërshtimet. Të dy për vite me radhë arritën të tërhiqnin vëmendjen publike me provokime të qëllimshme. Por në një moment, të dy duket se e humbën këtë aftësi.
Kundër mënyrës se si qeveris Rama si kryeministër i Shqipërisë po protestojnë tashmë dhjetëra mijëra njerëz. Ata e akuzojnë për korrupsion, autoritarizëm dhe se është i nënshtruar ndaj Trump.
Edhe Kanye West, i njohur për një periudhë si Ye, nuk pritet më mirë kur shfaqet në publik. Për shkak të deklaratave të tij të shumta antisemite, ai është bërë i padëshiruar në shumë vende.
Miliona euro për një arenë të përkohshme
Tani rrugët e këtyre dy figurave kryqëzohen.
Të shtunën e ardhshme, Kanye West pritet të mbajë një koncert në periferi të Tiranës. Qeveria e Edi Ramës planifikon të shpenzojë më shumë se 4 milionë euro për këtë ngjarje, ndër të tjera për ndërtimin e një arene të përkohshme.
Pavarësisht presionit të madh politik në vend, autoritetet vazhdojnë ta mbështesin projektin.
Sipas Ramës, qeveria e tij e vuri në dispozicion këtë shumë “në minutën e fundit”, për të mos e vënë Shqipërinë në siklet përballë afro 25.000 vizitorëve të huaj, të cilët kishin blerë tashmë bileta për koncertin.
Ai shtoi se shumë prej tyre kishin frikë se koncerti do të anulohej. Sipas Ramës, në Shqipëri priten vizitorë nga 80 vende të botës, të cilët do të udhëtojnë posaçërisht për koncertin e Kanye West.
Qeveria premton “të paktën” 100 milionë euro të ardhura
Rama deklaron se koncerti do t’i sjellë Shqipërisë të paktën 100 milionë euro të ardhura. Sipas tij, rezervimet për akomodim janë rritur ndjeshëm për shkak të këtij eventi.
Kryeministri është mësuar të flasë për shuma të mëdha. Prej vitesh ai përpiqet të tërheqë investime dhe mbështetje politike ndërkombëtare për Shqipërinë, dikur një nga vendet më të izoluara të Adriatikut.
Megjithatë, shumë nga protestuesit, kryesisht të rinj, e akuzojnë se po e shet vendin tek investitorët e huaj.
Në qendër të debatit ndodhet projekti për një resort luksoz që dhëndri i presidentit amerikan Donald Trump, Jared Kushner, planifikon të ndërtojë në mes të një zone të mbrojtur natyrore. Ky projekt ka nxitur protestat masive që vazhdojnë prej javësh në Shqipëri.
Marrë nga Der Spiegel
