Donald Trump nuk mundi t’i rezistonte një thumbimi ndaj Taylor Swift-it, pas humbjes së Kansas City Chiefs në Super Bowl, duke bërë komente ironike edhe pse u largua herët nga eventi.
Presidenti aktual shkroi në platformën e tij Truth Social teksa ishte rrugës për në Florida, me shumë gjasa në Air Force One: “I vetmi person që pati një natë më të keqe se Kansas City Chiefs ishte Taylor Swift. Ajo u FISHKËLLYE e u detyrua të dilte nga stadiumi. MAGA nuk fal!”
Në platformën e tij, Trump ndau disa klipe, përfshirë pamje të tij mes tifozëve që festonin dhe një tjetër video ku pretendohej se dëgjoheshin fishkëllima ndërsa Swift dhe Ice Spice shfaqeshin në Skycam-in e stadiumit.
Postimi i tij kontrovers nxiti debate – a po sugjeronte Trump se duartrokitjet ishin për të dhe fishkëllimat për Swift-in, apo reagimet u përzien në atë moment?
Videot e qarkulluara nuk e bëjnë të qartë nëse presidenti u prit me brohoritje, apo thjesht iu bashkua entuziazmit të turmës.
Postimi i Trump-it vjen, ndërsa ai u prit me brohoritje gjatë himnit kombëtar nga tifozët e Kansas City Chiefs dhe Philadelphia Eagles, teksa bëri paraqitjen e tij të shumëpritur në Super Bowl LIX në New Orleans.
Me mijëra të famshëm dhe të ftuar të rëndësishëm të pranishëm, u raportua më herët këtë javë se presidenti Trump do të fluturonte për në New Orleans për të ndjekur ndeshjen e Super Bowl mes Chiefs dhe Eagles.
Kjo vizitë u shndërrua në një histori të madhe gjatë gjithë javës, pasi Trump u bë presidenti i parë në detyrë që ndjek një Super Bowl.
Prania e Trump-it në event bëri që autoritetet të rrisin masat e sigurisë në qytet, sidomos pas sulmit terrorist të muajit të kaluar në Bourbon Street.
Pavarësisht çështjeve urgjente si shkurtimi i stafit të USAID-it, mbështetja për dëbime masive dhe përpjekjet për të kufizuar të drejtat e atletëve transgjinorë, Trump gjeti kohë për të ndezur sërish konfliktin me Swift-in.
Këngëtarja, e cila për vite me radhë i mbajti larg vëmendjes qëndrimet e saj politike, kritikoi hapur Trump-in gjatë mandatit të tij.
Një rast i njohur ishte në 2019-ën, kur Swift shkroi një letër kundër qëndrimit të Trump-it ndaj Aktit të Barazisë, i cili synonte zgjerimin e ligjeve për të drejtat civile për të përfshirë orientimin seksual dhe identitetin gjinor, sipas Irish Star.
Ajo gjithashtu e akuzoi Trump-in për “kërcënim me dhunë” gjatë protestave për George Floyd-it në 2020-ën dhe për “shkatërrimin” e Shërbimit Postar para zgjedhjeve. Konflikti i tyre u përshkallëzua, kur Swift mbështeti Kamala Harris në zgjedhjet presidenciale të 2024-ës.
Në gusht, Trump shpërndau imazhe të krijuara nga inteligjenca artificiale që pretendonin se Swift e mbështeste atë, gjë që më vonë e mohoi. Në shtator, ai la të kuptohej se Swift “me gjasë do të paguante një çmim” për mbështetjen ndaj Harrisit.
Duke folur për Fox News, Trump deklaroi: “Nuk jam fans i Taylor Swift-it,” duke shtuar: “Ishte thjesht çështje kohe para se ajo të mbështeste një demokrat. Ajo s’kishte si të mbështeste Biden-in, por është shumë liberale dhe gjithmonë mbështet demokratët. Me gjasë do ta paguajë këtë në treg.
Marrë nga Daily Mail
