Legjenda e televizionit italian, Giuseppe Vittorio Raimondo “Pippo” Baudo, është ndarë nga jeta në moshën 89-vjeçare.
I lindur më 7 qershor 1936, karriera e tij televizive zgjati mbi gjashtë dekada, duke e shndërruar në një nga personazhet më të dashur e më të respektuar në Itali. Pippo Baudo ka qenë jo vetëm prezantues, por edhe drejtor artistik dhe president i Teatro Stabile di Catania, duke lënë gjurmë edhe në skenën teatrore.
Një nga momentet më të paharrueshme në karrierën e tij ndodhi gjatë hapjes së Festivalit të Sanremos në vitin 1995, kur një burrë kërcënoi se do të hidhte veten nga galeria. Ishte vetë Baudo ai që arriti ta ndalonte, duke fituar duartrokitjet e të gjithë publikut.
Në vitet që pasuan, ai prezantoi një sërë programesh, mes tyre “Novecento”, “Sabato Italiano”, si dhe për vite me radhë emisionin e famshëm “Domenica In”. Por mbi të gjitha, Pippo Baudo do të mbahet mend për rekordin e tij të jashtëzakonshëm: ai ka drejtuar 13 edicione të Festivalit të Sanremos, duke kaluar edhe mikun e tij Mike Bongiorno, i cili e kishte prezantuar 11 herë.
Me ndarjen e tij nga jeta, Italia humbi një figurë simbol të kulturës popullore dhe televizionit, ndërsa kujtimi i tij mbetet i lidhur ngushtë me disa nga momentet më të paharrueshme të spektaklit italian.
Marrë nga ANSA
