Gjykata Kushtetuese ka rrëzuar kërkesën e Partisë Demokratike e cila kërkoi që të shpallej i papajtueshëm me Kushtetutën vendimi i Kuvendit për mosdërgimin në këtë gjykatë të mocionit që lidhej me papajtueshmërinë e mandatit të deputetit socialist Vullnet Sinaj.
Padia e firmosur nga 14 deputetë të PD-së u depozitua në Kushtetuese më 5 Mars, vetëm pak ditë para tejkalimit të afatit.
Ligji për funksionimin e Gjykatës Kushtetuese parashikon se “kërkesa për papajtueshmëri të funksionit të deputetit mund të paraqitet në Gjykatën Kushtetuese për sa kohë vazhdon mandati i deputetit, por jo më vonë se 6 muaj para përfundimit të mandatit…”.
Mandati i deputetëve aktualë të Kuvendit të Shqipërisë përfundon në shtator, kur edhe pritet të betohen 140 deputetët e rinj që dolën nga zgjedhjet parlamentare të 11 majit. Si rrjedhojë, mocioni i papajtueshmërisë së mandatit për deputetin Sinaj nuk mund të shqyrtohej nga Gjykata Kushtetuese pas datës 10 mars.
Provat e sjella në mocion ishin disa fatura blerjesh nga institucione publike pranë rrjetit të supermarketeve “Big Market” në pronësi të Sinajt, që kapin shifrën 3.6 milionë lekë të reja (36 milion lekë të vjetra).
Por ndërkohë, mocioni i papajtueshmërisë i firmosur nga deputetë të opozitës u shqyrtua në Këshillin e Mandateve dhe Rregullores që në datën 20 nëntor të vitit të kaluar dhe prej rreth 2 muajsh, kryetarja e Kuvendit, Elisa Spiropali nuk e thirri një mbledhje tjetër të këtij këshilli për të vijuar me procedurat.
Pra, Vullnet Sinaj i shpëtoi mandatit në radhë të parë nga zvarritja e Elisa Spiropalit deri në dërgimin në Kuvend për votim, por edhe nga vonesa e kreut të grupit parlamentar të PD-së, Gazment Bardhi, i cili e dërgoi padinë në Gjykatën Kushtetuese vetëm 5 ditë para përfundimit të afatit kushtetues, duke ngritur një rol të dyshimtë të tij.
Kjo është hera e dytë që tek Gazment Bardhi ngrihen dyshime për mënyrë “teknikalitete” i shpëton mandatet socialistëve. Hera e parë ishte me Olta Xhaçkën.
Më konkretisht, kur ishte pjesë e grupit “Alibeaj”, Bardhi dërgoi një padi në Kushtetuese vetëm me firmat e 14 deputetëve të opozitës (1/10 së Parlamentit), pjesë e grupit “Alibeaj”, për të rikthyer çështjen e mandatit të Xhaçkës në Parlament.
Kjo padi u pranua, por në këtë mënyrë, Gjykata Kushtetuese i hoqi të drejtën vetes për të shqyrtuar një tjetër kërkesë, të hartuar nga 28 deputetëve opozitarë (1/5 e Parlamentit), të atashuar me Sali Berishën, që kërkonin shpalljen e pavlefshme të mandatit të Olta Xhaçkës, pa marrë “miratimin” e Kuvendit.
Për këtë kërkesë “të dytë”, Gjykata Kushtetuese vendosi pushimin e gjykimit, për shkak se “tashmë” çështja ishte rikthyer në Parlament, dhe historia vijoi më pas me ngritje kartonash të kuq nga deputetët socialistë me urdhër të Edi Ramës për të mbrojtur Olta Xhaçkën.
Por, edhe për rastin e Vullnet Sinajt, Boldnews.al ka raportuar më herët se në planin politik, e gjithë historia rezulton një betejë e kotë e opozitës që merrej me kacidhet e Vullnet Sinaj, ndërkohë që miliardat e menaxhuara nga super-ministria e Belinda Ballukut fluturojnë në erë, sa në projekte infrastrukore me kosto shumë herë më të larta se vendet më të lodhura të Bashkimit Europian, aq tek shpenzimet për energjinë, të cilat nuk shihen as ku përdoren dhe as ku fluturojnë.
Marrë nga Boldnews.al
