Vendimi i fundit i FIFA-s ka ndezur një valë të madhe polemikash dhe reagimesh në rrjetet sociale, duke vënë në dyshim paanshmërinë e turneut.
Përballja e vlefshme për fazën e 1/8-ave mes Francës dhe Marokut, e cila do të zhvillohet të enjten në Boston, do të drejtohet nga arbitri 44-vjeçar Facundo Tello dhe asistentët e tij nga Argjentina. Duke marrë parasysh rivalitetin e ashpër mes dy kombëtareve, të cilat llogariten si pretendentet kryesore për trofeun, kjo zgjedhje është pritur me skepticizëm të thellë.
Reagimet e tifozëve online kanë qenë të ashpra dhe të drejtpërdrejta. “Një trupë e plotë argjentinase për një ndeshje të Francës? FIFA po bën gjithçka për të manipuluar sërish Kupën e Botës në favor të Argjentinës,” shkruan një tifoz i indinjuar. Të tjerë ironizojnë me tone të larta: “FIFA nuk fshihet më. Pse nuk sjellin edhe Messin të kontrollojë dhomën e VAR-it?” apo “Jeni mashtrues, kjo është e qëllimshme nga një organizatë e korruptuar.”
Megjithatë, këto akuza për komplot duket se anashkalojnë një detaj thelbësor nga kalendari i këtij Botërori: vetëm pak ditë më parë, të martën, ishte një treshe arbitrashe franceze ajo që vendosi drejtësinë në fitoren dramatike me përmbysje të Argjentinës kundër Egjiptit. Madje, në atë takim, francezët anuluan një gol të dytë të egjiptianëve edhe pse këta të fundit arritën të shënonin sërish më pas, një detaj që thekson paradoksin e këtyre teorive konspirative rreth arbitrimit.
Marrë nga SuperSport.al
