Vepra të realizuara përgjatë viteve 1991-2010 në vendin tonë do të vijnë përmes fotografive në ekspozitën “Things Take Time”. Ekspozita që do të hapet këtë muaj në Qendrën për Hapje dhe Dialog është me fotografi nga fotografë të huaj dhe vjen e kuruar nga Sylvia Sachini. Në materialin nga CDO mbi ekspozitën thuhet se pas 45 vitesh diktaturë, një dritë po shihej në fund të tunelit. “Era e re frynte përtej drejt perëndimit. Muri i Berlinit ra, diktaturat gjithnjë e më shumë po binin…thirrjet e të rinjve për një Shqipëri evropiane dëgjoheshin kudo. Revoltat e qytetarëve, protestat deri tek lëvizja e madhe studentore e dhjetorit 1990, që tregoi se fuqia absolute e shtetit totalitar u dobësua. Për Shqipërinë nisi një epokë e re”, thuhet për ekspozitën. “Things Take Time” është ekspozita më e re që Qendra për Hapje dhe Dialog-COD prezanton më 17 korrik. Sipas COD, ekspozita do të sjellë vepra të realizuara përgjatë viteve 1991-2010, kohë që pasqyrojnë periudhën e rënies së komunizmit.
“Nën kujdesin e kuratores Sylvia Sachini, ekspozita me fotografi të bëra nga fotografë me famë ndërkombëtare të “MAGNUM PHOTOS” e që vijnë si dëshmi historike dhe gjithashtu si një ndihmë për të kuptuar tranzicionin që ndodhi në Shqipëri gjatë atyre viteve. Në çeljen e ekspozitës na nderojnë me praninë e tyre vetë artistët të ardhur nga vende të ndryshme të Evropës; Alex Majoli, Carl De Keyzer, Enri Canaj, Martin Parr dhe Nicos Economopoulos”, thuhet nga COD. Kjo ekspozitë vjen si bashkëpunim i Qendrës për Hapje dhe Dialog, “MAGNUM PHOTOS”, Institutit Italian të Kulturës, Ambasadës së Greqisë në Shqipëri, MISC-ATHENS dhe Albanian Center of Photography (ACOP).
Fotografia nga Alex Majoli pjesë e ekspozitës
Qendra për Hapje dhe Dialog ka publikuar dhe një fotografi të fotografit Alex Majoli që vjen në “Things Take Time”. COD shprehet se na sjell në këtë ekspozitë një prej fotove të tij si kujtesë e kohës së ndalimit të transmetuesve të huaj, që kur televizioni kishte hyrë në familjet shqiptare përgjatë komunizmit duke treguar hilaritet. “Edhe pse në fshehtësi të plotë, familjet krijuan mekanizma të ndryshme se si të arrinin valët televizive italiane, greke, malazeze, etj, në shtëpitë e tyre”, thuhet nga COD.
Alex Majoli është një fotograf italian i njohur për dokumentacionin e tij të luftës dhe konfliktit. Ai është anëtar i Magnum Photos. Vepra e Alex Majolit ka në fokus gjendjen njerëzore dhe teatrin brenda përditshmërisë sonë. Ekspozita do të jetë e hapur në COD për publikun nga data 17 korrik deri më 17 gusht 2024. Ekspozita që do të hapet këto ditë vere në Qendrën për Hapje dhe Dialog-COD në Tiranë vjen në vijim dhe të atyre që janë hapur më parë për publikun, ku nuk kanë munguar dhe ato me punë të artistëve ndërkombëtarë.
